Прывітанне

Сярэдняя: 5 (1 голас)
Зноў я з вамі, са сваімі,
      Мілыя сяляне!
Будзем разам спатыкаці
      Ночку і світанне.

Станем разам у парадак
      З плугам на папары
Спольна скібіну варочаць,
      Нажываць загары,

Над работай непрыдумнай
      Вясковай пакоры
Будуць здаля баяць байкі
      Хвойкі, ясакоры.

Скіба ў скібу, гоні ў гоні
      Высцелем на дзіва;
Ляжа зерне, ўзойдзе колас, —
      Узрастай шчасліва!

За плугамі за сваімі
      На прасторы божым
Чыстым сэрцам, вольнай думкай
      Песню-казку зложым.

Пойдзе плавам песня-казка
      Ў свет аб нашай славе,
Дзіву дасца свет вялікі
      Гэтакай праяве.

Хай свет знае, што патрапе
      Без чужых прымусаў
Беларуса праца, сіла,
      Сэрца беларуса.

Як нас знаходзяць

-

Апошнiя водгукi

Раiм наведаць


Каб дадаць спасылку
на Ваш сайт, пiшыце ў
зваротную сувязь

Лічыльнікі