Янка Купала

У кожнага — свой Купала...
У мяне ён — само Купалле,
само неўміручае свята
песень,
кветак,
кахання,
кастроў...

У кожнага — свой Купала…
У мяне ён — само змаганне,
сама неўміручая прага
свабоды,
годнасці,
праўды,
сяброў.

Мае трывогі — Купала,
і перамогі — Купала.
Маё трыванне — Купала,
маё шанаванне — Купала...
Маёй куванне зязюлі,
майго кананне татулі
якраз на Івана Купалу, —
усё гэта Янка Купала,
чым я жыву — Купала...
З днём нараджэння,
жыццё!

Еўдакія Лось