Я не для вас...

Я не для вас, паны, о не,

Ў час вольны песенькi складаю, —

Што спала ў сэрцы там на дне —

Буджу i ў свет на суд пускаю.

Я не для вас, паны, о не!

Я не для вас, паны, о не,

Падчас збываюся спакою,

Калi ў вачах сляза блiсне,

Маркотнай вызвана душою, —

Я не для вас, паны, о не!

Я не для вас, паны, о не,

Свае днi лепшыя марную, —

У вечнай з мукамi вайне

Жыву i радасцi не чую —

Я не для вас, паны, о не!

Я не для вас, паны, о не,

Падняць скiбiну слова рвуся

На запусцелым дзiрване

Сваёй старонкi Беларусi,

Я не для вас, паны, о не!

Я не для вас, паны, о не,

Над доляй плачу свайго люду,

З гразёй змяшалi б вы мяне

Сваёй нiкчэмнасцю прыблудаў...

Я не для вас, паны, о не!

Я не для вас, паны, о не,

Пяю. Вам не паняць мучэння;

Вам ваша сэрца не дрыгне

На голас братняга цярпення,

О, не дрыгне, паны, о не!

Я не для вас, паны, о не!..

Адною ўцехаю жыццё вам,

Знячулi ў сытасцi, вiне,

Вас не разжалiш праўды словам,

О, не разбудзiш вас, о не!

Я не для вас, паны, о не!..

А я для бедных i загнаных,

Я з iмi мучуся ўраўне,

Ў адных закут з iмi кайданах...

Я не для вас, паны, о не!..

Я — для тых цёмных, нешчаслiвых.

Ад iх i водгаласак мне

Прымчыцца па лясах, па нiвах.

А не для вас, паны, о не!

Пакінуць водгук

Янка Купала

Я не для вас...

Раздзелы

Перыяды творчасці

Катэгорыі паэзіі

Гады творчасці

Як нас знаходзяць

Апошнiя водгукi

Раiм наведаць

Лічыльнікі